စိုက်ပျိုးရေးသုတေသနဦးစီးဌာန

ဝါသီးနှံ

၁၉၂၀ ခုနှစ်မှစ၍ ဝါသုတေသနလုပ်ငန်းများကို မလှိုင်ခြံတွင် စတင်ဆောင်ရွက်ခဲ့ပါသည်။ စိုက်ပျိုး ရေးသုတေသနဌာနတွင် ၁၉၇၄ ခုနှစ်မှစ၍ အမျှင်ထွက်ပင်ဌာနစုကို ဖွဲ့စည်းပြီး ဝါသုတေသနလုပ်ငန်းများကို ဆက်လက်ဆောင်ရွက်ခဲ့ပါသည်။ ၁၉၇၄ ခုနှစ်မှ ၁၉၈၃ ခုနှစ်အတွင်း ပြည်ပမှ မျိုးများတင်သွင်းခြင်းနှင့် မျိုးမွေးမြူရွေးချယ်ခြင်းတို့ကို မလှိုင်ခြံ၊ လွန်ကျော်ခြံ၊ မိတ္ထီလာ ဝါသုတေ သနစသည်တို့နှင့် ပူးပေါင်း ဆောင်ရွက်ခဲ့ပါသည်။ မြန်မာ့ဝါနှင့် ပိုးချည်လုပ်ငန်း တည်ထောင်ချိန်မှစ၍ ဝါသုတေသနလုပ်ငန်းများကို သီးခြားလုပ်ကိုင်ခဲ့ကြပါသည်။ ၂၀၀၆ ခုနှစ်တွင် စိုက်ပျိုးရေးသုတေသနဦးစီးဌာနတို့ပူးပေါင်း၍ စက်မှုသီးနှံ ဌာနစုအဖြစ် ဖွဲ့စည်းပြီးနောက် ဝါနှင့်ပိုးချည်လုပ်ငန်းနှင့်ပူးပေါင်း၍ မျိုးသစ်များဖလှယ်စမ်းသပ်ခြင်း၊ သုတေသနစီမံချက်များ ပူးပေါင်းရေးဆွဲခြင်းတို့ကို ဆောင်ရွက်နိုင်ခဲ့ပါသည်။ ၂၀၁၆ ခုနှစ်အထိ ချည်မျှင်တိုဝါ(၃)မျိုး၊ ချည်မျှင်ရှည်ဝါ(၄)မျိုးတို့ကို မွေးမြူထုတ်လုပ်နိုင်ခဲ့ပါသည်။

ဆောင်ရွက်လျက်ရှိသော လုပ်ငန်းများ

စုပ်ပိုးဒဏ်ခံပြီး ဝါဂွမ်းအရည်အသွေးကောင်း၍ အထွက်နှုန်းမြင့်မားသည့် မျိုးသစ်များ ရရှိရန် ရည်ရွယ်ဆောင်ရွက်လျက်ရှိပါသည်။

မျိုးတင်သွင်းရွေးချယ်ခြင်း

ပြည်ပမျိုးများတင်သွင်းရွေးချယ်နိုင်ခြင်းမရှိပါ။ ပုဂ္ဂလိကကုမ္ပဏီများမှ တင်သွင်းလာသော ချည်မျှင်ရှည်ဝါမျိုးသစ်အနည်းငယ်ကိုသာ စမ်းသပ်လေ့လာနိုင်ခဲ့ပါသည်။

မျိုးကူးစပ်မွေးမြူရွေးချယ်ခြင်း

နှစ်စဉ်စပ်မျိုး(၄)တွဲ မျိုးကူးစပ်နိုင်ခဲ့ပြီး မျိုးကူးစပ်ရွေးချယ်ခြင်းအဆင့်ဆင့်တွင် လိုင်း (၁၆၂)လိုင်း ကို စိုက်ပျိုးရေးသုတေသနဦးစီးဌာနအောက်ရှိ ဒေသခြံများနှင့် ဝါနှင့် ပိုးချည်လုပ်ငန်းဌာန အောက်ရှိ ခြံများ တွင် စိုက်ပျိုးရွေးချယ်လျက်ရှိပါသည်။

စပ်မျိုးဝါသုတေသနလုပ်ငန်း

စပ်မျိုးဝါထုတ်လုပ်ရန်အတွက် အဖိုမြုံလိုင်းများမွေးမြူခြင်း၊ အဖိုမျိုး R လိုင်းများ ရှာဖွေ ခြင်း၊ ပေါင်းစပ်စွမ်းရည်စမ်းသပ်ခြင်းတို့ကို ဆောင်ရွက်လျက်ရှိပါသည်။

အဖိုမြုံလိုင်းများ မွေးမြူခြင်း – ၅၄ လိုင်း

အဖိုမျိုး R လိုင်းများ ရှာဖွေခြင်း – ၉ လိုင်း

ပေါင်းစပ်စွမ်းရည်စမ်းသပ်ခြင်း – ၃၃ လိုင်း